AEON週三特價日｜資訊、必買、早鳥

最後更新日期 : 2021年1月7日

AEON星期三特價日（俗稱超三）非常受顧客歡迎，以下為大家解答常見嘅問題同話畀大家知有咩必買！除咗超市會有特價貨品，其實百貨部份都會有少量特價貨品㗎，不妨兜個圈睇下啊！

• 特價日適用分店

特價日於AEON全線百貨分店及獨立超級市場均有舉行，包括AEON STYLE康怡、黃埔，AEON屯門、荃灣、大窩口、九龍灣、九龍城、荔枝角及將軍澳店，AEON SUPERMARKET尖沙咀、藍田店。部分特價常溫產品亦會於Mono Mono銅鑼灣店發售。

• 邊間分店比較好？

喺咁多間分店入面，AEON STYLE康怡面積最大，人流亦最多。不過，康怡店設有大量收銀櫃位及自助付款機，實際都唔會比起其他分店耐好多㗎。而大窩口、九龍灣、九龍城、荔枝角、尖沙咀人流相對比較少。小編覺得九龍灣店其實都幾少人㗎，不過位置上就比較隔涉。留意返，九龍灣店及尖沙咀店超市面積相對較細，產品／貨量就未必咁齊全喇。

• 特價日時間、早鳥優惠？

特價日於星期三舉行。不過，部分分店（不包括康怡、黃埔、屯門、荃灣，其他分店則有）會提早至星期二夜晚6點後發售特價日嘅常溫乾貨產品。（即不包括任何新鮮食品、急凍或冷凍產品）

留意返，熱門產品會比較快賣晒㗎！例如$20嘅日本蛋，有時分店下晝就會賣晒喇！建議可以早啲去購買。

• 特價日優惠產品／有咩必買？

你可以於AEON官網睇到每個星期嘅特價日產品，一般逢星期一就會更新嗰個星期嘅新版本。不過，實際上有好多產品有優惠但唔會喺單張列出㗎！尤其是間中供應商或者會提供一啲期間限定嘅特價產品、或者新產品㗎，落舖頭行下就最清楚喇！

我哋推薦嘅產品就有：

• $3薯片 （有卡樂B、熱浪、日清湖池屋）
• $3伊麵王（海鮮、香濃紅燒牛肉味） - 雖然呢個杯麵冇咩特別，但係$3真係超抵食！
• $3百福豆漿
• $3韓式罐裝飲品、指定汽水（包括七喜）、清涼爽/馬蹄爽、Jolly Shandy
• $5炒麵王 - 喺其他超市大特價都好難見到5蚊㗎！不過AEON永遠都係得藍/紅/鐵板牛柳3隻味道嘅（Update : 陸續有新口味「麻辣味」喇！）
• $5李錦記甜/辣椒/煲仔飯豉油
• $10韓式小籠包 - 擺落微波爐叮2分幾鐘就食得！好食！
• $10灣仔碼頭水餃/小雲吞（指定款式）
• $15雀巢乳酪140g 3杯 - 普通超市140g版本要成$7-$8㗎！而其他超市3杯裝只有100g，而且好少賣到$15，AEON呢度獨家140g㗎！
• $15片裝芝士
• $20日本白蛋
• $28法國黃油春雞 （限部份分店）

部分分店或者未有發售特定產品，歡迎留意話畀大家知你覺得有咩抵買呀！